Një hap më afër edukimit mjedisor të qëndrueshëm

Në Elbasan, Kukës, Vlorë dhe Tiranë, INCA zhvilloi trajnime mbi Edukimin Mjedisor dhe Zhvillimin e Qëndrueshëm për mësuesit e shkollave 9 vjeçare të këtyre rajoneve, të ndarë sipas cikleve I–V dhe VI–IX.

Këto trajnime ishin pjesë e aktiviteteve të projektit të financuar nga Bashkimi Europian, EP-EACH (Environmental Protection – Education and Attitude Change).

Projekti ka hartuar një manual për mësuesit, me teori dhe veprimtari praktike, për t’i ndihmuar të realizojnë më efikas orët e edukimit mjedisor. Qëllimi është interpretimi i informacionit edukues dhe krijimi i emocioneve pozitive tek nxënësit, për më shumë dashuri e respekt ndaj mjedisit.

Projekti po zbatohet në bashkëpunim me Shoqatën Kombëtare të Parqeve të Shqipërisë dhe me UNICEF si partner i asociuar. EP EACH ecën mbi praktikën dhe modelin e zbatuar nga UNICEF më shumë se një dekadë më parë, duke e përshtatur me kurrikulat aktuale dhe duke e zgjeruar përtej klasave I–V, përfshirë edhe klasat VI–IX. Sot, projekti e bashkërendon këtë përvojë me zhvillimet më të fundit dhe tematika globale si Zhvillimi i Qëndrueshëm, Ekonomia Qarkulluese dhe Ndryshimet Klimatike, duke e bërë më koherent dhe gjithëpërfshirës në angazhimin e mësuesve, prindërve, komuniteteve dhe organizatave OJF me fokus mjedisin dhe edukimin.

Projekti synon të forcojë trekëndëshin e bashkëpunimit prindër–shkollë–komunitet, me fëmijët në qendër të tij, për një ndryshim sjelljesh dhe zhvillim të qëndrueshëm për sot dhe të ardhmen. Fëmijët janë e ardhmja – politikanët, investitorët dhe qytetarët e së nesërmes.

Mjedisin e kemi marrë hua dhe do të duhet ta japim hua atyre, duke e respektuar dhe mbrojtur për një jetë më të mirë.

Ky trajnim është planifikuar si “Trainer of Trainers”, duke fuqizuar mësuesit dhe OJF të që të bëhen vetë trajnerë dhe të shpërndajnë njohuritë e fituara tek kolegët e tyre, duke e zgjeruar ndikimin e projektit në mënyrë të qëndrueshme.

 

#EuropeanUnioninAlbania #EdukimiMjedisor #ShoqëriaCivile #INCA #SHKPSH #UNICEF #BashkimiEvropian #EP_EACH #greeneducation