Paneli “HoReCa Pa Plastike” – Një hap i madh drejt gjelbërimit

 

 Më 28 Shkurt, në kuadër të Panairit Kombëtar HORECA EXPO Albania, u zhvillua paneli HoReCa – Pa Plastike, ku ekspertë, përfaqësues të bashkive dhe biznese të sektorit HoReCa ndanë përvojat e tyre mbi reduktimin e plastikës njëpërdorimshe. Diskutimet u përqendruan tek sfida globale e ndotjes plastike dhe tek zgjidhjet konkrete që hotelet, restorantet dhe kafenetë mund të ofrojnë për një të ardhme më të pastër.

U theksua se Mesdheu është një nga detet më të ndotura nga plastika në botë. Plastika nuk zhduket, por shpërbëhet në mikroplastikë që hyn në zinxhirin ushqimor, duke dëmtuar shëndetin e njerëzve dhe ekosistemeve. Në këtë kontekst, projekti BeMed+ u prezantua si një shembull frymëzues i metodologjisë që ndihmon bizneset të eliminojnë plastikën njëpërdorimshe dhe të marrin hapa të qartë drejt gjelbërimit.

Çfarë ofron BeMed+ për sektorin HoReCa:

Udhëzues dhe plan veprimi praktik në gjuhën shqipe për hotele, restorante dhe kafene

Mbështetje për biznese pionierë që testojnë zgjidhje pa plastike në zonën pilot të pellgut ujëmbledhës të lumit Shkumbin

Certifikimin “Ocean Friendly” nga Surfrider, që i jep bizneseve reputacion si liderë të gjelbër dhe të përgjegjshëm

Trajnime dhe konsulencë për hapa praktikë që çdo biznes mund të ndjekë, si dhe mbështetje me mjete alternative dhe ndërgjegjësuese

Përfaqësuesit e bashkisë Elbasan dhe bizneset pjesëmarrëse ndanë eksperiencat e tyre, duke treguar se përfshirja në projekt shihet si një hap i rëndësishëm drejt transformimit të sektorit. Mesazhi kryesor i panelit ishte i qartë: bizneset e gjelbra janë fjala e së ardhmes dhe çdo aktor i sektorit HoReCa mund të japë një kontribut të qenësishëm për reduktimin e ndotjes nga plastika.

Paneli tregoi se ndryshimi është i mundur dhe se bashkëpunimi ndërmjet institucioneve, bizneseve dhe komunitetit është çelësi për një HoReCa pa plastike.